წყალი: ყველაზე მარტივი ჩვევა, რომელიც ჯანმრთელობაზე დიდ გავლენას ახდენს

ყოველდღიურად წყალს ვსვამთ, თუმცა იშვიათად ვფიქრობთ, რამდენად დიდ როლს ასრულებს ის ჩვენს ორგანიზმში. რეალურად, ადამიანის სხეულის დიდი ნაწილი წყლისგან შედგება და სწორედ ის უზრუნველყოფს უამრავ სასიცოცხლოდ მნიშვნელოვან პროცესს.

როდესაც წყალს საკმარისი რაოდენობით არ ვიღებთ, ორგანიზმი ამას მალევე გვაგრძნობინებს - ზოგჯერ ეს მხოლოდ დაღლილობაა, ზოგჯერ კი თავის ტკივილი, კონცენტრაციის გაძნელება ან წყურვილის ძლიერი შეგრძნება.

წყალი მხოლოდ წყურვილის მოსაკლავად არ გვჭირდება

ორგანიზმში წყალი ასობით პროცესში მონაწილეობს. ის ხელს უწყობს საკვების ნივთიერებებისა და ჟანგბადის გადატანას, არეგულირებს სხეულის ტემპერატურას, იცავს სახსრებს, უზრუნველყოფს თირკმლების გამართულ მუშაობას და ეხმარება ორგანიზმს არასაჭირო ნივთიერებების გამოყოფაში.

საჭმლის მონელებაც, სისხლის მიმოქცევაც და ნივთიერებათა ცვლის მრავალი ეტაპიც სწორედ წყლის საკმარის რაოდენობაზეა დამოკიდებული.

რა ხდება, როცა წყალს საკმარისად არ ვსვამთ?

დეჰიდრატაცია ყოველთვის მძიმე ფორმით არ იჩენს თავს. ხშირად პირველი ნიშნები საკმაოდ მსუბუქია და ბევრს სხვა მიზეზს უკავშირებს. წყლის ნაკლებობაზე შესაძლოა მიუთითებდეს:

• წყურვილის ხშირი შეგრძნება;
• პირის სიმშრალე;
• მუქი ფერის შარდი;
• დაღლილობა;
• თავის ტკივილი;
• თავბრუსხვევა;
• კონცენტრაციის გაძნელება.

რამდენი წყალი გვჭირდება სინამდვილეში?

ერთიანი პასუხი არ არსებობს. წყლის საჭირო რაოდენობა განსხვავდება ასაკის, სხეულის წონის, ფიზიკური აქტივობის, კლიმატისა და ჯანმრთელობის მდგომარეობის მიხედვით.

ჯანმრთელი ზრდასრულისთვის საშუალოდ დღეში დაახლოებით 2-3 ლიტრი სითხის მიღება საკმარისია. მნიშვნელოვანია იცოდეთ, რომ ამ რაოდენობაში მხოლოდ სასმელი წყალი არ შედის - სითხეს ორგანიზმი საკვებიდანაც იღებს. ხილი, ბოსტნეული, სუპები და სხვა სასმელები ყოველდღიური ჰიდრატაციის ნაწილს წარმოადგენენ.

თუ ბევრს ვარჯიშობთ, მუშაობთ ცხელ გარემოში ან ინტენსიურად ოფლიანობთ, სითხის მოთხოვნილებაც იზრდება.

მართლა აუცილებელია დღეში 8 ჭიქა წყლის დალევა?

ეს რეკომენდაცია წლების განმავლობაში პოპულარული იყო, თუმცა დღეს სპეციალისტები მას უნივერსალურ წესად აღარ მიიჩნევენ. ზოგ ადამიანს ნაკლები წყალი სჭირდება, ზოგს - მეტი. გაცილებით მნიშვნელოვანია ორგანიზმის სიგნალების გათვალისწინება, ვიდრე კონკრეტული რაოდენობის შესრულება.

კავა და ჩაი წყლის დალევაში ითვლება?

დიახ. თანამედროვე კვლევების მიხედვით, ზომიერი რაოდენობით მიღებული ყავა და ჩაი ორგანიზმის სითხის ბალანსში მონაწილეობს. მიუხედავად იმისა, რომ კოფეინს მსუბუქი შარდმდენი ეფექტი აქვს, ყოველდღიური მოხმარების პირობებში ის დეჰიდრატაციას არ იწვევს. თუმცა, წყალი მაინც რჩება სითხის მიღების საუკეთესო წყაროდ.

შეიძლება ზედმეტი წყალიც საზიანო იყოს?

იშვიათ შემთხვევებში - დიახ. თუ ძალიან მოკლე დროში დიდი რაოდენობით წყალს ვსვამთ, სისხლში ნატრიუმის დონე შესაძლოა მნიშვნელოვნად შემცირდეს. ამ მდგომარეობას ჰიპონატრიემია ეწოდება. სწორედ ამიტომ, წყლის დალევა უმჯობესია დღის განმავლობაში თანაბრად გადაანაწილოთ.

მარტივი რჩევები, რომ მეტი წყალი დალიოთ

• დაიწყეთ დილა ერთი ჭიქა წყლით;
• ყოველთვის იქონიეთ თან წყლის ბოთლი;
• დალიეთ წყალი ყოველი კვების წინ;
• ვარჯიშის შემდეგ აუცილებლად შეივსეთ დაკარგული სითხე;
• თუ უბრალო წყლის დალევა გიჭირთ, დაუმატეთ ლიმონის, ფორთოხლის ან კიტრის ნაჭრები.

წყლის დალევა განსაკუთრებულ ძალისხმევას არ მოითხოვს, მაგრამ სწორედ ასეთი მარტივი ჩვევები ქმნის ჯანმრთელობის მყარ საფუძველს.